Ke Kumu Hawaii, Volume II, Number 18, 1 February 1837 — Page 71

1837.) KUMU HAWAII. 71

no ia, a no ka Haku kana a pau loa.— Minamina kona naau i ko ka Haku aupuni. Minamina a makemake. Ake no ia e huli mai na kanaka a pau a ola. Pela ke kanaka i loaa ia ia ke aupuni o ka Haku maloko o kona naau.

KA HUA O KA MINAMINA.

                Hooikaika kona manao e loaa i na kanaka a pau keia aupuni maikai. Aole oluolu kona manao i ka haipule wale iho no. Ninau pinepine oia, "Pehea la e hiki mai ai ko ka Haku aupuni maikai i na aina a pau? Pehea la e laha ai ko Iesu aupuni? Ma ka pule a noho wale iho na ekalesia a pau anei? Pela anei Iesu i hana'i? Noho palaka anei Iesu a pule wale iho? — Aole; lilo loa Iesu i ka hana e huli mai ai na kanaka a ola. Kaahele oia i ka aina mai Galilaia a i Iudea. Pela hoi o Paulo mai o Ierusalema aku a i Helene a Italia e hoohuli ana i na kanaka. Aole i noho a imi waiwai kela.

KE KAUOHA A KA HAKU.

                Ua kauoha mai ai o Iesu ia kakou, "E hele ae oukou e hoohaumana aku i na lahuikanaka a pau. E ao aku ana ia lakou e malama i na mea a pau a'u i kauoha aku ai ia oukou.''
                I mai paha kekahi; "Makemake no au e hele a e ao ma ka aina naaupo, aka aole au i makaukau; aole nui ko'u ike. Ina e hele wau, pau koke ko'u ike." Oiaio no, alaila aole oe e pono ke hele me kou hemahema a me kou naaupo. Aka ea! pehea, e ikaika anei kou manao e hele ka poe ike? Ikaika anei oe e hoomakaukau ai kahi poe a e hele.
                Ikaika anei oe e hana ma kahi i loaa ia oe? Aole i loaa ia oe ka hele, aka ua hooikaika anei oe e kokua i ka poe hele? - Heaha kau i hana ma keia aoao ma kou aina iho? Ua hoomaka anei oe ma kou wahi iho e hoakaka i kou minamina i ka pono?

KE KOKUA ANA O NA EKALESIA MA AMERIKA.

                Nui na kala i lilo mai e kokua ia oukou i kela makahiki a i keia makahiki. Haawai mai na makamaka ma Amerika i ka lakou mau kala a me ka lakou mau pepa a nui loa e kokua mai ia oukou nei i kela makahiki keia makahiki, i laha ai ko ke Akua aupuni iwaena o oukou. Mai manao hoi, o ka poe waiwai wale no ka poe i kokua mai. Nui na mea ilihune na wahinekanemake. Na paahana i haawi i ka lakou wahi kala no loko mai o ko lakou nele, no ka minamina i ko oukou ola.
                Ea, e na hoahanau; mahea ko oukou kokua ana i mama ka lakou hana a e hiki hoi ia lakou ke haawi nui aku no ko Aferika poe a no ko Noweke poe? Minamina anei oukou i kona aupuni, a kokua ole. Aole anei hookahi ola, - hookahi aupuni ia kakou a me lakou? Na lakou wale no anei e hapai i keia hana, aole kakou kekahi! Aka ua hooili oukou, i ke kukulu ana o na hale kula maluna o lakou. Ina aole lakou e hoolimalima i ka oukou mau kumu a uku aku ai ia lakou i ka lakou kala, ina aole a oukou kula iki! a minamina ka oukou i keia pono!! O ke kala a lakou i haawi mai ai e paa na hale kula, a tausani a tausani, o na kala, no na hale kula a me na kumu, nohea mai la ia? No na ekalesia no; no na hoahanau ilihune a me na wahinekanemake i hooikaika ma Amerika e kokua mai e pono oukou. Nolaila na kala a na misionari i uku aku ai i na 'lii no ko lakou moku e holo ai. Ina makemake kekahi e holo maluna o ka moku, manao kekahi alii hoahanau, e uku no ka holo ana, Aka ua minamina na'lii hoahanau i keia aoao. Manao paha kekahi ua pono na misionari ke hana maikai wale mai e haawi wale i na palapala, a me ka laau lapaau me ka uku ole, e ao aku ai ia oukou me ka uku ole, e ao aku ai ia oukou a me ka oukou mau kamalii i kela la i keia la me ka uku ole, a e uku aku ai i na'lii hoi no ka noho hana wale, uku ole iwaena o oukou. Pehea na hoahanau, makemake anei oukou e laha ko Iesu aupuni? Nui ka hana koe ina makemake o oukou. Aole kohu ka makemake noho palaka. O ka makemake hana oia ka makemake kohu. E hana kakou kela mea keia mea i ka hana ku pono ia ia e kokua i ko ka Haku aupuni! -  Pela e hiki mai ko ka Haku aupuni. Pela e akaka ai ua oiaio ka kakou pule, aole pule waha wale no, aka ina pule kakou a hana ole, he pule oiaio anei kela? - Aloha oukou.
Na ALOHAKANAKA.

HE WAHI MANAO NO ANA WAIAKEA.

                E na wahine moe kolohe; Ke manao nei au, he mea hoopailua loa keia mea e hana nei. E uwe ana na wahine moe kolohe i ke ahi a mau loa.
                Eia kuu wahine manao ia kakou, e na hoahanau, he pono e ae kakou i ka olelo a ke kahu hipa maikai, o Iesu, ka mea nana e lawe ka hewa.
                O ka moe kolohe he mea hewa ia. E na wahine hou; e luai aku oukou i keia hana nui a kakou. E poino loa ana na mea hookamakama i ke aupuni o ka Haku. Nani wale ka nui o ko kakou naaupo i keia manawa, e na wahine ike ole i ka lako o ka olelo a ke Akua. He mea hilahila ia mamua o ka Lunakanawai nui, o Iesu.

KE KUMU HAWAII.
WENEDE, FEBERUARI 1, 1837.

                HOIKE. Ua hooike na kula ma Honolulu nei i ka la 19 o Ianuari. Ua like paha keia hana me na hoike i ka wa mamua; aole nui loa ke akamai, a me ka naauao o na haumana a me na kumu; no ka mea, pela na haumana a pau. Okoa kekahi. O na haumana a Mi. Kimita, ua makaukau lakou; no ka mea, ua hooikaika lakou ma ka palapala i keia la i kela la.
                He wahi manao ko'u. E na kamalii, e hiki no ia oukou ke loaa ka naauao, ke hooikaika oukou; ke hele aku i ke kula me ka manao aloha. Ina e noho molowa ana oukou, alaila, aole e hiki, aole loa.

                KUMU MUA. Ua pai hou ia keia buke na na kamalii. He kanakolukumamalua aoao iloko me na kii palapala kanaonokumamalima. He palapala maikai ia e ao aku ai i na kamalii ike ole i ka heluhelu palapala.
                Auhea oukou, e na makua? Ua ike anei ka oukou keikikane, a me na kaikamahine i ka heluhelu? Ua hele anei lakou i ka hale kula i kela la i keia la? Ua ao anei oukou ia lakou i ka ke Akua mau kauoha a me kana olelo? Eia no ko Iehova leo ia oe, e ka makua.
                "O keia mau olelo a'u e kauoha aku nei ia oe i keia la, e waiho no ia maloko o kou naau.
                A e ao pono aku oe ia mau mea i au keiki, a e kamailio aku ia mau mea i kou noho ana ma kou hale, a i kou hele ana ma ke ala, i kou moe ana ilalo, a me kou ala iluna.
                A o nakii oe ia mau mea i hoailona ma kou lima, a e lilo ia, i mea e hoomanao ai mawaena o kou mau maka.
                A e kakau oe ia mau mea ma na lapauila o kou puka hale, a me na puka pa ou.''

NO KA MAKA A ME KE KEIKI.

                Ika wa maua, mahope paha o ka aina awakea, ma Honolulu kahi mea