Ke Kumu Hawaii, Volume II, Number 18, 1 February 1837 — Page 69
KE KUMU HAWAII.
HE PEPA HOIKEIKE I NA MEA E PONO AI KO HAWAII NEI.
"O ka pono ka mea e pomaikai ai ka lahuikanaka; aka, o ka hewa ka mea e hoinoia'i na aina."
Buke 2. HONOLULU, OAHU, FEBERUARI 1, 1837. Pepa 18.
NO KA ELEKA.
Ua like kekahi ano o ka Eleka me ko ka dia. Ua nui na ano o na dia, okoa kahi, okoa kahi. O ka Eleka ka mea nui loa o na dia a pau. Ua kiekie a ua loloa ke kino, pokole ko ka lio.
He ano e ka helehelena o ka Eleka.
No ka loihi loa o kona mau wawae, ua like ia me ka mea e hele ana ma ke kukuluaeo, ua pokole kona huelo, ua manoanoa ka ai, a ua like ka loa me ka loa o ke poo. Ua loihi loa kona lehelehe luna, a ua palahalaha, ua lewa loa ilalo. He nui loa kona mau pepeiaohao, a ua manamana loa me he lima la.
Ua ahinahina eleele ka Eleka, ua loloa kona huluhulu, a ma ka ai ua loihi loa, a ua paa pu, a ua oolea.
He ilio kolohe ole ka Eleka, aole huhu iki. He ilio nui no, aka, no kona makau wale, e holo no ia, ke ike mai ke kanaka, a he ilio uuku paha.
Ma na ululaau ma Amerika Akau kahi i ike nui ia ka Eleka, ua ikea no hoi ma ka akau o Europa.
O na lalalaau, a me ka nahelehele a me ka mauu, a me na mea uliuli, oia no kana mea ai. O kona lehelehe nui ka mea e lawelawe ai, a no ka loihi o kona mau wawae, e hiki no ia e lalau i ka ai, ma kahi kiekie. Ina e lua anana, hiki no.
He mea lokomaikai, a he mea kolohe ole, ka Eleka, aka, ina i hoopaaia, aole oluolu. Ina i hoolakaia i ka Manawa opiopio, e hiki wawe no ke ao aku ia ia e hahai i kona kahu, a e hoolohe no i ka leo o ke kahu, aka, ina i kauia ka mea hana maluna ona, alaila, lele oia, a imi ino, a paupauaho koke, nolaila, aole i hoohanaia ka Eleka.
Aole he mea waiwai ka Eleka, ma kana hana ana, aka, he mea waiwai no kona kino ke loaa. Oia kekahi mea i ai nui ia e na Inikini, a me na kanaka hele ma kahi loihi iloko o ka ululaau. He mea ono loa kona io; he maikai kona ili, i mea kamaa, a oia hoi ka waa